Berrian ospatzekoak eta hobetzekoak

Denok ezagutzen dugu Berria, euskarazko egunkari nazional bakarra. Online bertsioa ere, Berria.info, oso erabilia da euskaldunen artean. Horregatik, Berria egunkariaren web gunearen analisi honetarako, batez ere bi gauzatan jarriko dugu arreta: euskararen normalizazioaren alde burututako alde positiboak, batetik, eta Berria.info web orrian hobetu ahal diren alderdiak, bestetik.

Hasteko, argitu behar da Berria izatea bera ezinbesteko urratsa dela euskararen normalizazioaren alde, euskarazko bakarra delako Euskal Herri mailan. Beraz, egunkariaren online bertsioa ere indartsua izan behar da. Euskaldunari beharrezkoak zaizkion eskakizunak betetzen saiatu behar da, bai eta euskara modu eraginkorrean zabaltzen ere.

Hedabideko alde positiboenen artean hizkuntzaren erabilera da. Sareko hedabide baten testuak zuzena, hipertestuala, multimedia, ulerterraza eta hitz gakoduna izan behar du. Berria estilo ulergarri eta erabilgarri bat sortzen saiatu da betidanik, eta hori euskeraren normalizazioaren aldeko pausu oso garrantzitsua da, euskera zuzena eta ulerterraza egiten dutelako. Gainera, honek laguntzen du gertuagoko edukiak plazaratzen eta jende gehiagorengana iristen. Euskera batua eta orokorrean formala erabiltzen den arren, badaude aldaerak, eta egunkariak erabiltzen duen hizkuntza moldea ez da beti berbera: adibidez, berriaTB-ko bideo batean norbait elkarrizketatzen dutenean, erregistroak ez du zertan formala edo idatziz erabiltzen denaren modukoa izan. Aldaera geografikoak ere sartzen dituzte (betiere batuaren barruan), izaera nazional hori indartuz.

Sareko hebadide batek erabilera ere bultzatu beharko luke. Berriak mugarria ireki zuen bide horretan: Berriketan.info. Euskarazko sare sozial honetan, kazetariak eta erabiltzaileak berriak eta iritziak parteka ditzakete. Zenbait emankizunetan zuzeneko kontakizuna egiteko ere erabiltzen dute. Hau euskal erabiltzaileentzako plaza da sarean, momentu batzuetan beste leku erdaldunetara jo behar izatea sahiesten duena.

Berria, gainera, Twitter eta Facebook-en ere badago. Sare sozialetan egoteak, hedabidearen presentzia hobetzeaz gain, hizkuntza ere kokatzen du.

Sareko hedabide batek multimedia izan beharko luke beti. Idatzizko ohiko egunkariak beste mediekin jolasten hasi dira, eta Berria ez da atzean geratu. BerriaTB, argazkiak eta infografiak (Hegoaldeko azken hauteskundeen inguruko infografia interaktibo interesgarri hau, esaterako) adibideak dira. Baina alderdi hauek hobetzeko prozesu iraunkorrean egon behar dute. BerriaTBren kasuan, esaterako, edukiek izan behar dute lehentasuna, kalitatezko bideoak ekoizteko helburuarekin. Edukiaren arabera interesa ere handituko da.

Multimediatasuna ez ezik, interaktibotasuna hobetu beharko luke Berriak. Adibide bat jartzearren: kasu gehienetan, ez dago artikuluetan iruzkinak idazteko aukerarik. Hau webgunearen edukien estrategiagatik gertatzen da: Berria.infok egunkariko eduki gutxi batzuk igotzen dituzte eta eguneko albisteekin osatzen dituzte. Albiste hauek hiperestekatu gabe geratzen dira, edukien kaltetan. Beraz, hipertestualitatea, berrien arteko loturak ezartzen duena, ez dago behar bezala landuta. Gehiago egin daiteke.

Oso lan garrantzitsua eta beharrezkoa egiten du Berriak euskararen eta informazioaren alde, baita sarean ere. Sareko ezaugariak (multimedia, interaktibitatea eta hipertestuak) idartuz, gainera, euskarak behar duen bidea leun dezake. Esan dezakegu euskararen erramintarik eraginkorrenen artean kokatzen dela hedabidea. Eta ezin dugu ahaztu, Berria hobetzea suposatzen duen edozein urrats euskararen normalizazioaren aldeko pausua izango dela.

Euskarazko multimedia hedabideen eskaintza

Gaur egun, sarea da komunikatzeko modurik eraginkorrena eta etorkizun argiagoa duen hedabidea. Ez genuke nahi euskararik gabeko sarea, eta ezinezkoa dugu Internetik gabeko euskara ere irudikatu. Euskal hedabideek Interneten egon behar dute, halabeharrez. Ezin ukatu sarean bide ona egiten ari direla euskarazko hedabideak. Kalitatezko produktu asko dago. Gaur egun, erabiltzaile euskaldunak (zahar zein berri) badauka euskarazko eskaintza zabala jasotzeko aukera Internet bidez, eta hedabide-sare hau ezinbestekoa da euskararen erabilera sustatzeko.

Badakigunez, modu ezberdinetan egiten eta zabaltzen da hedabide bakoitza, xede-taldearen arabera (hedabidearen eskualdearen erabera eta irakurleen adinaren arabera) bai eta edukien arabera (informazio orokorra, zientziari buruzko artikuluak edo entretenimendua, kasu). Jorratu beharreko bidea eta espero beharreko emaitzak ezberdinak dira, eta ez dira zertan alderagarriak izan. Ezin dugu konparatu, adibidez, eitb.com gune orotariko, nazionala eta masiboa Ttipi-Ttapa lokala eta xumeagoarekin. Hala ere, garrantzitsua da, euskara normalizazio egoera batean sartzea nahi baldin bada, eskaintza zabala eta askotarikoa aurkitu ahal izatea.

Hiru dira hedabideek erreparatu beharreko aldagaiak Interneten: edukiak, multimediatasuna eta elkarreragina. Edukiek, helburua edozein dela, beti izan behar dute berebiziko garrantzia. Ardura nagusiena izan behar du, kalitaterik gabe nekez joko baitu irakurleak gure hedabideetara. Era berean, eduki hauek Internetek zabaldutako bide berrietan landu eta kudeatu jakin behar da. Gaur egun, beharrezkoa da gure eskaintza hainbat formatutan egotea, denak web gunearen plataforma bakarrean biltzen diren arren. Esan nahi baita, idatzizko testuak, bideoak, argazkiak eta soinuak elkartzen dituen multimedia formatuan ekoizten saiatu behar dira hedabideak. Multimediak informazioa eta hizkuntza bera osatzen du. Hedabide nagusienek ere (EITB edo Berria, adibidez) alde honetatik oraindik daukate hobetzekorik.

Edukiak zelan zabaltzen diren ere garrantzia hartzen du hedabidearen arrakastan: interaktibotasuna edo elkarreragina sartzen da jokoan. Web 2.0 izaera barneratuta edukitzea ezinbestekoa da hedabideen helburuak betetzeko. Elkarreraginari esker, erabiltzaileak edukiak zabaldu ez ezik, euskara bera presentzia indartuko du, bai web gunetik bertatik baita sare sozialen bidez ere.

Sarean topatzen dugun eskaintza ospatzekoa den arren, zuloak ere ikusten ditugu. Hizkuntzaren egoera soziolinguistiko bereziak (hiztunen banaketa geografiko aldakorra, elebidunen arteko ezberdintasunak, diglosia...) beharrezkoa egiten du euskal hedabideen lana ahalik eta zehatzena izatea. Euskarak eskaintza hoberena merezi eta behar du, ez baititu erronka errazak aurrean. Dauden (eta oraindik sortzeke dauden) hedabideek zulotxo horiek estaltzen dituzten heinean, euskara merezitako esparrua irabaziz joango da, euskararen erabilera sustatzeko ezinbestekoa.

Hedabideak euskararen itsasoan

Hizkuntza bakoitzari egoera soziolinguistiko bat dagokio. Soilik hori kontuan izanda planifika daiteke hizkuntza horrek behar dituen hedabideak nolakoak izan behar diren. Euskararen kasuan, hedabideek, informazioa, entretenimendua eta kultura eskaintzeaz gain, euskararen mapa osatzen baitute. Berebiziko garrantzia dute euskararen normalizazioaren aldeko bidean.

Euskara oso modu ezberdinetan banatzen da bai Euskal Herriko mapan zehar baita biztanleria-piramidean ere. Euskararen ezagutza handiagoa da EAEn Nafarroan eta Iparraldean baino: elebidunen %83,7a EAEn dago. Era berean, gazteena da elebidun gehien hartzen dituen adin-tartea. Erabilera, baina, bestelakoa da: Hegoaldean gora doan bitartean, Iparraldean behera (gazteen artean joera kontrakoa den arren).

Egoera soziolinguistikoa askotarikoa den herrian hedabideek ere askotarikoak izan behar dute. Alde batetik, hedabide orokorren itzala indartu beharko litzateke. Hedabide hauek (ETB 1ek eta, batez ere, Berriak) euskararen mapa zabaltzen dute Euskal Herri osoan zehar, kohesioa ematen dioten bitartean. Gainera, euskara erraz ulertzeko modu batean aurkezten dute. Hauekin batera, euskarazko tokiko hedabideak ere beharrezkoak dira: bakoitzak eskualdearen ezaugarriei erantzun beharko die, hango elebidunen eskaerak behar den moduan asetzeko. Planifikazio honek edukietan, xede-taldean eta euskaran bertan dauka eragina, ez baita erronka bera Bilborako, Tolosalderako edo Erriberarako hedabide bat kudeatzea.

Kasu guztietan, edukiek izan behar dute nagusitasuna. Erabiltzaileak kalitatezko zerbitzu bat jasotzen duela somatu behar du, lehendabizi euskarazko hedabidera jotzeko. Honekin batera, Internet bidezko multimedia izaera ziurtatuta egon beharko litzateke, euskara euskarri guztietan egoteko helburuarekin.

Era berean, eta euskararen erabilera sustatzeko, ezinbestekoa da hedabideen interaktibotasuna. Horrela, hedabideak euskaraz egiteko gunea zabaltzen dio elebidunari, ezagutza erabilera bilakatzeko bidean. Zentzun honetan, hizkuntzak berak, hedabideen eskuetatik helduta, ezin du sare sozialen trena galdu. Sare sozialak dira eguneko bizitza informalaren isla, batez ere nerabeen artean. Hedabideak hemen egonda, euskara mundu akademikotik kanpo ere erabiltzea bultza daiteke. Eta horrela, agian, euskara bere egoeraren itsaso zabalean indartzea lortugo genuke.

KULTURiZE: euskal agenda kulturala mugikorrean

Lehen, kultur ekitaldiak non ospatzen ziren jakiteko hainbat hedabidetako agenda ezberdinak begiratu behar genituen: batak lurralde bateko ekitaldiak baino ez zituen biltzen, besteak ez zituen guri gustatzen zaizkigunak erakusten... Eta askotan, ekitaldi interesgarri bat ospatu zela beranduegi konturatzen ginen.

Aurtengo Buberretan saritutako aplikazio bat hutsune hau betetzera dator: KULTURiZE. Android sistema eragilea daukaten mugikorrentzako zein iPhone-entzako sortutako agenda elektroniko honek Euskal Herriko ekitaldi kulturalak biltzen ditu telefono mugikorrean. Akting enpresako ingeniariek garatu dute.

Gertuko ekitaldiak gaika sailkatuta ikusteko aukera ematen du KULTURiZEk: musika, antzerkia, dantza, bertsolaritza, hitzaldiak... Erabiltzaileak egutegian eta mapan zehar nabiga dezake, bakoitzaren agenda pertsonalizatua sortzeraino. Gainera, ekitaldi bakoitza mapa batean kokatzen du aplikazioak. Horrela, zita jakin bezain laster Google Maps-era jo behar izatea sahiesten digute.

Momentuz, hiru dira KULTURiZE hornitzen dituzten agenda digitalak: Musika Zuzenean, Eke eta Kulturklik eta BarraBarra!. Ikuspegia Euskal Herri osokoa da, beraz. Intraktibotasuna sakontzeko asmoz, aplikazioak zuk zeuk antolatutako ekitaldiak sartzea ahalbidetzen du. Gertaera zabalduko duzu eta, gainera, gainontzeko erabiltzaileei agenda osatuko diezu.

Aplikazio hau, noski, doakoa da. Android-eko merkatutik edo Apple-ren App Store-tik deskarga daiteke. Ekitaldi batzuen kasutan, sarrerak erosteko forma ere ematen du, txarteldegira edo kutxazain automatikora hurbildu gabe.

Momentu honetan, esaterako, Twitter kontu ofizialean zabaldu dutenez, egunotan ospatzen ari den Durangoko Azokaren egutegi osoa jaso dezakezu, euskeraz, zure aplikazioan. Eskerrak eman beharko dizkiogu KULTURiZE superheroiari!

Super KULTURiZE (euskeraz) from akting on Vimeo.

Web 2.0ren zuzeneko adibidea

Web 2.0 informazioa partekatzea errazten duten aplikazioak erabiltzea da.

Web 2.0an interaktibitateak berebiziko inportantzia hartzen du. Mezua gaur bidirekzionala da. Igorle eta hartzaileak baino, erabiltzaileak daude. Lehen, mezua igorletik hartzailera zihoan, orain berriz, igorletik hartzailera eta hartzailetik igorlera doa. Denok parte har dezakegu web 2.0 bidez zabaltzen den komunikazio prozesuetan.

Baina, batez ere, web 2.0 jarrera kontua da. Web 2.0 filosofia ere bada. Daukagun informazioa modu irekian eta libreki plazaratzeko prest egotea esan nahi du komunikazioa irauli duen modu berri honek.

Hurrengo bideoan argi gelditzen da web 2.0 zertan datzan. Idoia Gaton klasekideak, eskolara bidean auto pilaketa batean gelditu zenean, Twitter sare soziala erabili zuen berandu helduko zela esanez. Gainera, momentu horretan kazetari web 2.0 bihurtu zen, auto pilaketaren zuzeneko informazioa plazaratu zuelako Twitterren (argazkia). Gainontzeko klasekideok bere informazioa ikusi eta mezuak erantzun genizkion. Bideo honetan, momentuan grabatutako egoera ikus daiteke eta web 2.0ren ezaugarriak eta, baterez ere, filosofia erakusten dira.

Obra hau Creative Commons lizentziapean dago.

Periodismo Humano ziber-hedabidearen analisia

Honako sarreran Periodismo Humano ziber-hedabidearen analisia egingo dut. Interneteko kazeta nahiko berria da eta betiko hedabideen kontrapuntua dela esan genezake. Ziber-hedabidea izanik, ez dauka papaperezko bertsiorik. Helburua ez da eguneko albisteak ematea, baizik eta giza eskubideen inguruan sortu daitezkeen kontuez informatu. Beraz, gizakia du abiapuntu. Esan beharra dago, era berean, Periodismo Humano irabazi-asmorik gabeko hedabidea dela.

ONARPEN-MAILA ETA AUDIENTZIA

Alexa web guneetako bisitak neurtzen dituen web orria da. Neurketa hau Alexa Toolbar deritzonaren bidez egiten du. Beraz, toolbar hau instalatuta dutenen artean egiten du neurketa Alexak. Datu horien arabera, ranking ezberdinak osatzen ditu Kaliforniako enpresak. Mundu mailako ranking-ean, Periodismo Humano 87442. postuan kokatzen du Alexak. Espainiako mailan, 2396. web gunea da. Honek esan nahi ez dela web orri bisitatuenen ligan jokatzen, agian ziber-hedabide jaioberria delako eta ez daukalako paperezko ordezkaririk. Alexaren datuen arabera, Periodismo Humano bi piko ditu: bata, 2011ko maiatzean (15M mugimenduaren mobilizazioen jarraiketarekin bat etortzen) eta abuztu bukaeran. OJD Interactiva datu-basean, aldiz, ez da agertzen.

INFORMAZIORAKO SARBIDEA

Gaztelera hutsezko hedabide honen atal nagusiak honakoak dira: Sociedad, Economía, Migración, Mujer, En Conflicto, Culturas, Cooperación eta, bereziturik, Enfoques eta Multimedia. Atal bakoitzak gai ezberdin baten inguruko informazioa eskaintzen du, aski argi egituratuta. Adibidez, Mujer atalean emakumeak protagonista dituen albiste, erreportai eta kronikak agertuko dira. En Conflicton, aldiz, munduko gatazka txikiak aurkituko ditugu. Enfoques atalean, beste ukitu bateko iritzi artikuluak irakurri ahal ditugu. Multimedian, batez ere, bideo-erreportaiak eta mikrodokumentalak ikusi ditzakegu, testu eta audio batzuez lagunduta. Egituraketa, esan bezala, nahiko argia eta antolatua da. Atalak, nire ustez, nahikoak dira, denborarekin beste batzuk gehitu ahal diren arren. Multimedia atalak garrantzi handiagoa izan beharko luke, Periodismo Humanoko sarrera bakoitzan multimedia izaera hori oso bermatuta badago ere.

Periodismo Humanoko bilaketa sistemak hitzen araberako bilaketa baino ez du egiten uzten. Argi dago dataren aldagaia sartzea idea hona litzatekeela, nahi den gaiari buruzko artikuluak aurkituz gain, interesatzen zaigun datan ere topatzea ahalbidetuko lukeelako.

Ziber-hedabide honek ez du aurreko edizioen artxiborik, kazeten edo beste ziber-hedabide batzuen bezalako eguneko edizioak ez dituelako jarraitzen. Artikulu bakoitzak data bat daukan arren, esan genezake Periodismo Humanok ez dituela eguneroko edizioak argitaratzen, baizik eta era jarraituan egiten duela. Horrela bada, hemeroteka ez da beharrezkoa. Hala ere, honek ez du esan nahi dataren araberako bilaketak baliagarriak ez liratekeela.

Ez dago web gunearen mapa ikusteko aukerarik. Atalak gutxi dira, baina, dudarik gabe, lagungarria litzateke.

Azaleko informazioetan ez dago azken gaurkotzearen ordua ikusterik, ez eta artikuluetan ere. Bai testuetan baita azalean ere eguna baino ez dugu ikusten. Autorearen gaineko informazioa, aldiz, agerikoa da: dataren eta lekuaren artean agertzen da, azalean eta testu nagusian. Kazetariaren izenean klikatzean, beren gaineko fitxa batera eroango gaitu web guneak. Han autorearen biografia eta e-maila ikusgai izango dutu, eta, izatekotan, baita bere blogaren helbidea eta Twitter kontuari linka ere. Berak idatzitako artikuluak ikusgai daude hemen.

Publizitatearen garrantzia eta lekua txikia da, goian esan dugun moduan, irabazi-asmorik gabeko ziber-hedabidea delako. Web orriaren goiko partean banner korporatibo bat ageri zaigu (hedabideari buruzko eta bazkideak irabazteko iragarkia; bazkideak irabazteko beste iragarki bat ere badago web guneko eskuineko partean), baina banner hau ezkutatzeko aukera ematen zaigu klik bakar batean. Periodismo Humano elkarte eta instituzio batzuk laguntzen dute. Beherago, elkarte hauen irudiak eta linkak ikusi ditzakegu. Ez dira iragarkiak, baina publizitatearen funtzioak egiten dutela esan dezakegu.

Ziber-hedabide honek RSS zerbitzua ahalbidetzen du, hau da, Google Reader bezalako irakurgailu batean albisteak jasotzeko aukera ematen du. Bi zatitan bananduta daude RSS kanalak: Secciones (lehen aipatutako 8 atal eta azala) eta Enfoques (7 autoreren iritzi artikuluak, izenez bereiztuta, eta hiru kanal berezi: Amnistía Internacional, Bottup, Greenpeace eta Médicos Sin Fronteras elkarteenak). "Euren berritasun guztiak" e-mailera jasotzeko posibilitatea dago, newsletter baten bitartez. Ez du, ordea, iPad, iPhone, Smartphone edo BlackBerry-etarako zerbitzu berezirik eskaintzen. Beraz, ez dago bertsio mobilik, web gunea gailu horien bidez ikusi daitekeen arren. Era berean, ez dago erregistratzeko aukerarik, eduki guztia doanekoa eta denok ikustekoa baita. Baina, lehen esan bezala, badago bazkide egiteko aukera.

Lehen aipatu dugu autorearen profila ikusi ahal dela kazetariaren izenean klikatzean. Horrez gain, El Equipo saila ere badaukagu, web orriaren beheko partean. Hemen kazetari, kolaboratzaile, iritzi emale eta gizarte zibila deritzona osatzen duten guztiak ageri dira, biografia eta guzti. Izenean klikatzean bakoitzaren blogera edo artikuluen artxibora eroango gaitu. Gainera, berriemaileak eta kolaboratzaileak bideo batek aurkezten ditu. Ziber-hedabide hau ez da ezein komunikazio taldearena, beraz, ez dago hori buruzko informaziorik. Ageri zaigu, ordea, hedabideari berari buruzko azalpena, Qué es periodismohumano.com atalean.

EDUKI INFORMATIBOA

Periodismo Humanon ez dago azken orduko albisteen atalik, orokorrean, azken orduko albisteak ez daudelako. Agian, momentu batean sortu daitezke, baina esan dezakegu albiste eta erreportai sakonak jorratzen dituela Periodismo Humanok.

Urriaren 26ko albisterik nabarmenduarena, dudarik gabe, honako titularra duena da: La fábula del jugador de fútbol y otros cuentos de terror de Bahréin. En portada zintapean sailkatuta dago, eguneko albiste garrantzitsuenari ematen zaion maila, hain zuzen. Lehen mailan, autorearen fitxara eta iruzkinetara garoazen estekak baino ez daude. En conflicto sailaren barruan kokatzen den albiste honen testuan, bigarren mailan, 13 esteka daude, denak txertatuak. Horietako 3 baino ez dira barruko loturak. Beste guztiak kanpokoak dira, eta honako webetara eramaten gaituzte: angry arabiya-ren Twitter profila, ElMundo.es, change.org, BCRH (2 lotura: hau eta beste hau), Amnesty International, HRW, The Arabic Network For Human Rights Information, Bahrain Youth Society For Human Rights eta alakhbar english. Ikusten denez, GKEak, giza eskubideen inguruko informazio orriak, sinadurak jasotzeko orriak, beste hedabideak edo sare sozialak dira lotutako web guneak. Barruko hiru loturek eta kanpoko gehienek informazioan sakontzeko helburua dute, bai eta iturriak aipatzeko (Twitter-ekoa, adibidez). Helburu interaktiboa aurki dezakegu change.org-n, eskakizun bat sinatzeko lotura delako.

Har dezagun garrantzian hurrengo artikulua. Titularra hauxe da: "Los cristianos de Siria somos uno con nuestros hermanos musulmanes". Emakume siriar anonimo baten hitzak dira. Ez da albistea; elkarrizketa da. Gainera, blog batean argitaratutako artikulua da (Alianzas blogean, hain zuzen). Ikusten dugunez, blogetako sarrerak azalean lekua dute. Elkarrizketa denez, loturak ohi baino gutxiago dira: 3 bakarrik, denak testuan txertatuak. Lehenengoa kanpoko lotura da, iturriak aipatzeko erabiltzen dena. Bigarrena barruko lotura da: Periodismo Humanoko azalera garoaz, ziber-hedabidearen izena aipatzen denean. Hirugarrenak, kanpoko lotura ere bai, informazioan sakontzeko helburua dauka.

Ez dago erreportaiei eskeinitako atalik. Baina, hala ere, azalean baliokide batzuk aurkitzen ditugu: En el camino (Hego Amerikako inmigrazioari buruz) eta Desentrañando Colombia (Kolonbiako gerrillaren inguruan). Batean zein bestean, bideoak ikusteko eta testua irakurtzeko aukera daukagu, microwebgune baten itxurarekin.

Lehen esan dugunez, Multimedia deituriko atala dauka ziber-hedabideak. Bideoak eskaintzen ditu, testuez lagunduta. Beraz, hipermedia produktuak eskaintzen dituela esan dezakegu, multimedia baino, media guztiek ez daudelako integratuta.

INTERAKTIBOTASUNA ETA PARTE-HARTZEA SUSTATZEKO ERRAMINTAK

Periodismo Humanok zenbait blog eskaintzen ditu, esaterako: El minotauro anda suelto, Toma la palabra edo Alianzas. Bakoitzak autore bati dagokio eta Enfoques sailaren barruan aurkitzen dira. Mota honetakoak 12 dira guztira. Baina, hemen ere beste bi motako blogak topatu ditzakegu: Sociedad civil (Amnistía Internacional, Greenpeace, Bottup eta Médicos Sin Fronteras elkarteen blogak) eta De referencia (zenbait autoreren kanpoko blogak, Guerra eterna, Quilombo eta Enrique Meneses kasu). Beraz, ziber-hedabidearen beraren autoreak irakurriz gain, euren aukeraketa ere eskura daukagu Periodismo Humanoren blogen atalan. Azkenik, P+DH daukagu, erredakzioaren bloga, hedabideari berari buruzkoak argitaratzeko. Ez dago, baina, erabiltzaileek blog bat sortzeko aukerarik.

Web 2.0 erremintei dagokionez, Periodismo Humanok sarrerak honako sareen bidez zabaltzea eskaintzen du: Facebook, Meneame, Digg, Twitter eta Bitacoras. Horretaz aparte, ziber-hedabideak Facebooken orrialdea eta Twitter-en profila sortuta dauzka. Lehen aipatu dugun bezala, erabiltzaileak sarrera guztiak RSS bidez ere jarraitu ahal ditu.

Ziber-hedabidearen izaerari jarraiki, irakurlearekiko interaktibotasuna bultzatzen da. Horrela, erabiltzaileek iruzkinak plazaratu ditzakete. Ez da erregistrorik behar iruzkinak idazteko, baina iraingarriak ezabatuko direla ohartarazten da. Ez dago albisteak bozkatzeko aukerarik ezta, ondorioz, albisteen sailkapenik ere. Web orriak ez du eskaintzen helbide elektronikoz sarrerak bidaltzeko aukerarik. Ez dago, era berean, inprimatzeko aplikazio berariazkorik edo baimen espezifikorik, edozein albiste inprima daitekeen arren, noski.

Autorearekin harremanetan jartzea errazten du Periodismo Humanok, bakoitzaren helbide elektronikoa izenan klikatzean lortu daitekeelako.

Foro edo txatei dagokienez, ziber-hedabide honek ez ditu zerbitzu hori eskaintzen. Inkesta digitalik ere ez ditu antolatzen. Esan dugunez, ez dago albiste irakurrien edo bozkatuen zerrendarik.

ZIBER-HEDABIDEA HOBETZEKO PROPOSAMENAK

Nire ustez, Periodismo Humanok erabiltzailearekiko interaktibotasuna nahiko bultzatzen du. Batez ere Facebook eta Twitter sare sozialetan, ez dutelako promozio hutsarako erabiltzen, baizik eta harreman hori benetan estutzeko. Aktiboak dira, gainera. Erabiltzaileak informazioa jasotzeko eta hedabideak zabaltzeko bide oso eraginkorrak dira sare sozialak.

Web gunearen diseinua erreza eta erakargarria da. Hala ere, edukia da ziber-hedabide honen gakoa. Edukia lantzen du gehien Periodismo Humanok eta, alde horretatik, bikain egiten du. Gainera, eduki hau hipertestualitatearen bidez jorratzen du. Hipermediatasuna ere aski landuda dago ziber-hedabide honetan, kronika honetan argi ikusten denez.

Hala eta guztiz ere, aldatzeko gauzak ere badaude. Esaterako, sarrerak dataren arabera ikusteko aukera, begi kolpe batean data ikustea aproposa delako zenbait bilaketetan. Ziber-hedabideak eguneroko edizioa ez duen arren, hemeroteka bezalako atala egingarria iruditzen zait. Periodismo Humanok ez daukan hainbat gauza, aldiz, ez zaizkit oso erabilgarriak iruditzen kasu honetarako, hala nola, txatak, foroa edo albisteak bozkatzeko aukera.

Edukia hobetzeko bidean, hau baita kazeta digital honen indargunea, multimediatasunari garrantzi handiagoa emango nioke, eduki benetan multimediak sortuz. Multimedia atala interesgarria da oso, hedabide honek dokumental batzuk ere egin dituelako, baina jorratzen dituzten gaiei buruzko infografia edo erreportaje guztiz muldimediak oso baliagarriak izan daitezke.

Giro di Lombardia: errepideari agur

Zapatu honetan, urriaren 15ean, errepideko denboraldiari amaiera emango dion proba ospatuko da Italian: Giro di Lombardia. UCI World Tour jaioberrian egutegiko azken lehiaketa da, baita geratzen diren puntuen hondarrak jasotzeko azken aukera ere. Gainera, udazkenean ospatuko den azkeneko Giro di Lombardia izango da, datorren urtean proba aurreratuko baitute. Aldaketa honek leihaketari onurak ekarri ahal dizkion arren, egia da 2012tik aurrera errepide-bazterrak kolorez aldatuta ikusteagatik zale asko penatuta agertuko direla.

Txirrindularitzaren Bost Monumentuetatik azkena apur bat ezberdina izango da aurten: Leccon bukatuko da, leihaketaren azken bi zailtasunak Madonna del Ghisallo eta Villa Vergano izanik.


Aurten, faborioei buruz hitzegiteak agian ez dauka zentzu handirik, faborito nagusi bakarra egon baita klasika guztietan: Philipe Gilbert (Omega Pharma-Lotto). Guztien erreferentzia izango da, beraz. Aurrean Italiako tropela topatuko du, iraganeko nagusitasuna berreskuratu nahian, nazioarteko beste izenekin batera: Chavanel, Brajkovic, Uran, Voeckler, Rodriguez, Fulsgsang, Roche, Monfort, Cancellara eta HTC-Highroad desagertu aurreko bere azkeneko proban, Cavendish ortzadar berria eta Velits buruan dituela. Euskaltel-Euskadiko Samuel Sanchez, 2.a izan dena, Igor Antonekin batera doa. Ikusteke dago zelan heltzen den denboraldi amaierara txirrindulari bakoitza, zelan esaten dioten errepideari agur.

Franco lurpetik ateratzea proposatu dute

Espainiako Gobernuak sortutako komisio batek Franco diktadore ohia Valle de los Caídos monumentutik ateratzea proposatu du, El Periodicoren arabera. Valle de los Caídos (Eroritakoen Arana, euskeraz) deritzon monumentuan, Francisco Franco diktadorea eta Jose Antonio Primo de Rivera Falangeren sortzaileaz gain, 36ko guerran matxinoen alde borrakatutako hildakoak eta Errepublikaren alde borrokatu zutenak daude ehortzita, gehienak familien baimenik gabe. 1940 eta 1958 bitartean erakiki zuten, frankisten "Gurutzada loriatsuaren alde eroritakoen memorian", monumentua altxatzeko diktadurako presoak erabili zuten arren.

Orain, 2006ko Memoria Historikoaren Legeari jarraiki, Francoren gorpua hobitik atera eta beste leku batera eramatea proposatu du komisioak (ziur aski, Carmen Polo emaztearen ondora), horrela han ehortzitako 22.000 errepublikazaleen oroimena zikintzea sahiesten delakoan. Komisioak Francoren alde altxatu ziren gainontzeko sinboloekin eta Espainan sakabanatuta dauden hezurtokiekin zer egitea erabaki beharko du.

Azaroaren 20a diktadorea hil zela 41 urte beteko dira eta, gainera, Espainiako Gorteetarako hauteskundeak ospatuko dira. Hala, gai honen inguruko eztabaida piz daiteke. Zer egingo zenuke zuk Francoren gorpuarekin eta Valle de los Caídos monumentuarekin? Zer egin beharko luke administrazioak Francoren aldeko gainontzeko sinboloekin?

Aurkezpentxoa

Zabaldu berri dudan blog hau Multimedia Komunikazioa masterraren barruan erabiltzeko izango da. Printzipioz, klaseko lanak hementxe argitaratzeko erabiliko dut. Denborarekin blog honen izaera aldatuz joan daiteke, batek daki.

Ondo etorri.